الموبايل وموظف شركة الاتصالات.. «والانتي بيوتك»

الفنانة سحر نوح ابنة الفنان الكبير محمد نوح والحاصلة على دكتوراه في الأوبرا ، كتبت علي صفحتها عبر «فيسبوك» مقالا عن مشكلتها مع إحدى شركات الاتصالات والأعطال المستمرة وسوء مستوى خدمة العملاء.

بوابة الشروق استاذنت الفنانة والمطربة سحر نوح في نشر المقال المكتوب بالهجة العامية، ونصه كالآتي:

بقالي فترة خط اتصالات عندي بيقطع والـ4g مش كويس فقلت النهارده أعمل شكوى وفعلا بعدها بشوية جالي تليفون من خدمة العملاء وبعد حوار قالي: «حاخلي شخص متخصص يكلم حضرتك بعد دقايق»، و فعلا شوية ورن التليفون، رديت: «ألو مساء الخير أستاذه سحر
– مساء النور
= معاكي فلان يا فندم من خدمة العملاء
– أهلا وسهلا
= حضرتك يافندم بخصوص الشكوى اللي حضرتك مقدماها، ممكن نتكلم فيها وتردي على شوية استفسارات علشان نسهل الموضوع؟
– تحت أمرك
= حضرتك مدام سحر.. الحكاية دي بتلاحظيها في البيت بس وللا في أماكن تانية؟
– في البيت وفي أماكن تانية
= اااااه كده بقى يبقي الموضوع بالنسبة لينا هاياخد شكل تاني
– شكل تاني إزاي مش فاهمة؟
= حضرتك أستاذة سحر لو كان التليفون بيقطع بس في منطقتك؛ يبقي عيب شبكة لكن لو بيقطع في كل حته يبقي ممكن يكون عيب موبايل، هو نوع موبايل حضرتك إيه يافندم؟
– آي فون7
= إحنا واحدة واحدة كده وهنفهم المشكلة.. طب حضرتك هل الموبايل وقع منك؟
– لا ماوقعش ولسه جديد.
= متاكدة يا فندم؟
– أيوه متأكدة
= طب استسمح حضرتك تشيلي الشريحة كام يوم، وتحطيها في موبايل تاني ونشوف هل المشكلة هتتحل ولا حاتفضل موجودة؟
– أنا -وابتديت اتنرفز- بقول لحضرتك المشكلة دي بقالي فترة بعاني منها وفيه كتير اشتكوا نفس الشكوى دي لما كتبت علي فيسبوك وتويتر، وأكيد أنا لو تليفوني وقع كنت هفهم إن العيب في التليفون ومن غير ماحضرتك تقولي كنت هحط الشريحة في موبايل تاني!
= هو -بمنتهي البرود- ممكن يكون وقع من غير ماتاخدي بالك يافندم وده بيحصل كتير
– بقول لحضرتك ان ناس كتير بتشتكي نفس الشكوى
= عادي يا فندم ممكن ٢٠٠ شخص يشتكوا ويكون العيب في الموبايل بتاعهم وممكن الموبايل يكون نوعه جيد لكن وقع وحصل فيه مشكلة، تخلي الشريحة مش في مكانها، وممكن الموبايل يكون نوعه سيئ أًو عادي لكن مافيهوش مشكلة فنقدر نستعمله.
– طب حضرتك عاوزني أعمل ايه بالظبط؟
= بصي يا فندم مطلوب منك حاجتين
– اتفضل..
= أولا: حاولي تشيلي الشريحة وتحطيها في تليفون تاني وثانيا إلغي 4g وخليه 3g بس وحاولي تلاحظي كده لما بتخرجي في أماكن تانيه بتلاقي نفس المشكلة وللا في منطقتك بس؟ واحنا هنتابع مع حضرتك تاني وتحت أمرك في أي وقت يا فندم.
– ابتدت عروقي تنفر وأحس بدوخه وهبوط، وقلت: هو أنا الحقيقة لما قررت أشتكي ده كان علشان بقالي فتره بعاني من الشبكة فحضرتك عاوزني أستنى شوية كمان ونتابع سوا بعد كده؟ ثم إني جايبة جهاز تقوية للشبكة في البيت وكل اللي عندهم في البيت خطوط بيعانوا برضه وأكيد مش كلنا ممكن موبايلنا يكون وقع
= (ببرود يفقع المرارة اللي أنا شايلاها أصلا)، قال: يا فندم كلهم في البيت بس ولا في كل حتة؟
– أكيد أنا بشوفهم وبلاحظ في البيت، لكن مش بنزل الحقيقة معاهم كل مشاويرهم علشان أتابع مشكلة الخطوط
= طب جهاز التقوية يا فندم بانتينا وشبه الراوتر ولا كبير؟ وهل اللمبة بتاعته زرقاء ومنورة، وهل المشكلة دي ظهرت في نفس الوقت؟ وهل كل البيت حس بالمشكلة دي برضه في نفس التوقيت؟
– هو أنا ليه حاسه إني بكشف عند الدكتور؟! وشوية وحضرتك هتقول لب ’خد مضاد حيوي وهتكتبلي علي تحاليل وآشعة؟!
= عادي يا فندم احنا بنتناقش علشان نفهم سوا سبب المشكلة
– هو أنا عملت شكوي علشان نتناقش.. وللا علشان حد يحل الموضوع؟
= طيب ممكن يا فندم تدينا العنوان علشان نبعت حد يشوف المشكلة؟
– اتفضل: عنواني كالآتي:…………
= طب لحظة معايا يافندم أشوف العنوان على الخريطة.
– (ابتدت دموعي تنزل وحسيت بندم إني أساسا عملت شكوى وإني قررت أحلها)، هو أنا هفضل في الحوار ده كتير؟
= لا يا فندم احنا بس هنراجع العنوان سوا بالتفاصيل ونشوف، هو يا فندم العنوان ده جنب ………؟
– ايوه
= هو وراكوا يا فندم ………؟
– أيوه
هو جنبكوا يا فندم ………..؟
– ايوه
= طب يناسب حضرتك يوم ايه؟
– أي يوم
= متاكدة يافندم؟
– أيوه أي يوم
= طيب، كنت عاوز أتاكد من حضرتك الساعة كام يناسبك؟
– أي وقت
= طيب أستاذة سحر ممكن استفسار تاني ؟!!!!!!!!!
قلت له تصبح على خير، وقفلت ومش عاوزة أحل المشكلة وهاخد “انتي بيوتك” وهاروح معمل البرج وأبطل السجاير واكون إنسان جديد وأكون انسان جديد وهييييييييييييييه!!!!!.

انت الان تتصفح خبر بعنوان الفنانة سحر نوح تكتب عن: الموبايل وموظف شركة الاتصالات.. «والانتي بيوتك» ونحن فى بوابة أخبار مصر لا نتحمل أى مسؤولية تجاه هذا الخبر ويمكن الرجوع الى المصدر الاصلي للخبر من هنا بوابة الشروق

This entry was posted in مشاهير. Bookmark the permalink.
[social-bio]

هل اعجبتك المقالة ؟ إنشرها الان على المواقع الاجتماعية

اترك تعليقاً